كشة يوم وقفة العيد

Arabic, القوانين والاوامر المحلية Laws & Local Orders, الاجهزة المنفذة للقانون Law Enforcing Bodies

كشة لمحلية الخرطوم في السوق العربي قريب من صينية القندول ودي بس الناس عرفت بيها عشان اتصورت لكن يومياً في كميات من الكشات تستهدف الفئات الضعيفة زي ستات الشاي والفراشين وفي السوق العربي – جاكسون الكشات بقت شبه يومية

رمضان 2014

دولة الجباية

Arabic, افادات الناجيات والناجيين Survivors Testimonies

مشاركة من مواطن

الظروف الليلة ساقنى لسوق الكلاكلة اللفة ، مفروض الاقى واحد صاحبى وإتاخر على وبقيت منتظره ، إتلفت عشان اقعد عند أى ست شاى ، والمفاجأة إنه مافى أى ست شاى ، وفى جهة من الشارع لمحت دفار حكومى وفيها عساكر بوليس وأفراد لابسين مدنى ، واضح إنهم ناس المحلية 
دخلت بواحد من اﻷزقة لقيت ست شاى بشارع داخلى وعندها كرسيين بس ، قعدت عندها وسألتها الحاصال شنو ، قالت لى ناس المحلية فارضين على ستات الشاى العايزة تشتغل تأجر منها كراسبهم والكرسى بجنيه اليوم ، يعنى لو 10 كراسى حأدفع 10 جنيه ،أو بيكشوا مننا كل كراسينا
وبيمنعونا ، دا غير إنه الموية فى الكلاكلات قاطعة ليها فترة أو بتكون ضعيفة لو جات.

فى مرة جنبها قالت لى يا ولدى ، هل تصدق أنا عندى أولاد أختى يتامى بيشتغلوا فى السوق المركزى بدراقات حقتهم ، المحلية برضو منع وصادرت الدراقات حقتهم وأجبرتهم لو عايزين يشتغلوا يأجروا منها الدرداقات حقتها 

 

أفتح ليها 152 – أفتح ليهم 154

Arabic, القوانين والاوامر المحلية Laws & Local Orders



كتابة: نظام الدين

الكلام دا لو ما مر بي أي زول هنا بصورة شخصية 
بيكون مر بيهو موقف او مشهد ما 

ًإفترض إنك ماشي في الشارع مع أي بت ، بما فيهم أختك مثلا
هل تعلم إنو من حق أي عسكري
يرفعك في بوكسي الطارة ويوديك القسم ؟؟

طيب أفرض إنو في عسكري لاقاك ماشة في أمان الله وشاغلك
هل إنتي عارفة إنو ممكن جدا يديك كف وينهرك : قدامي القسم ياتافهة ؟

طيب أفرض إنكم راكبين حافلة ، سواء بنات واولاد او اولاد بس
لو في أي عسكري عاوز إتجدع فيكم من حقو يشيل رخصة السواق
ويقوليهو حصلني الأوسط ؟؟

قبل اوريكم من حقو ليه
الكلام دا قبل كدة لاقاك والا مالاقاك ؟؟
دا طبعاً لو ماحصل ليكم شخصياً

ببساطة نحنا عندنا مشكلة أساسية
إننا مابنهتم بالقانون ، مع إنو القانون دا هو البيحكم حياتن

البوست دا نموذج بس لي مادتين من القانون الجنائي حقنا الشغال هسي دا
والمادتين ديل مسؤلة من تطبيقهم شرطة النظام العام
اللي هم العساكر الفوق ديل

ﻣﺎﺩﺓ ( 152) : ﺍﻷﻓﻌﺎﻝ ﺍﻟﻔﺎﺿﺤﺔ ﻭﺍﻟﻤﺨﻠﺔ ﺑﺎﻵﺩﺍﺏ ﺍﻟﻌﺎﻣﺔ

ﻣﻦ ﻳﺄﺗﻰ ﻓﻲ ﻣﻜﺎﻥ ﻋﺎﻡ ﻓﻌﻼً ﺃﻭ ﺳﻠﻮﻛﺎً ﻓﺎﺿﺤﺎً ﺃﻭ ﻣﺨﻼً ﺑﺎﻵﺩﺍﺏ ﺍﻟﻌﺎﻣﺔ
ﺃﻭ ﻳﺘﺰﻳﺎ ﺑﺰﻱ ﻓﺎﺿﺢ ﺃﻭ ﻣﺨﻞ ﺑﺎﻵﺩﺍﺏ ﺍﻟﻌﺎﻣﺔ
ﻳﺴﺒﺐ ﻣﻀﺎﻳﻘﺔ ﻟﻠﺸﻌﻮﺭ ﺍﻟﻌﺎﻡ ﻳﻌﺎﻗﺐ
ﺑﺎﻟﺠﻠﺪ ﺑﻤﺎ ﻻ ﻳﺠﺎﻭﺯ ﺃﺭﺑﻌﻴﻦ ﺟﻠﺪﺓ ﺃﻭ ﺑﺎﻟﻐﺮﺍﻣﺔ ﺃﻭ ﺑﺎﻟﻌﻘﻮﺑﺘﻴﻦ ﻣﻌﺎ

كدي اقرأ المادة دي تاني
وحاول طلع منها جريمة مثبتة قطعياً كدة عشان تستحق العقوبات دي
ما ح تلقى

ح تلقى كلام عام وعائم وفضفاض
المصيبة الكبرى فيهو إنو البقرر الجريمة هو العسكري المطبق للقانون دا

ما أظن الموضوع دا محتاج شرح كتير
لكن ببساطة من حق اي عسكري تحديد قانونية أو عدم قانونية أي تصرف إنت بتتصرفو
وكذلك اللبس اللابسو أي زول او زولة في الشارع

اما المادة الأكتر خطورة وتأثيرها أكبر هى

ﻣﺎﺩﺓ ( 154) : ﺟﺮﻳﻤﺔ ﻣﻤﺎﺭﺳﺔ ﺍﻟﺪﻋﺎﺭﺓ
ﻳﻌﺪ ﻣﺮﺗﻜﺒﺎً ﺟﺮﻳﻤﺔ ﻣﻤﺎﺭﺳﺔ ﺍﻟﺪﻋﺎﺭﺓ ، ﻣﻦ ﻳﻮﺟﺪ ﻓﻲ ﻣﺤﻞ ﻟﻠﺪﻋﺎﺭﺓ
ﺑﺤﻴﺚ ﻳﺤﺘﻤﻞ ﺃﻥ ﻳﻘﻮﻡ ﺑﻤﻤﺎﺭﺳﺔ ﺃﻓﻌﺎﻝ
ﺟﻨﺴﻴﺔ ﺃﻭ ﻳﻜﺘﺴﺐ ﻣﻦ ﻣﻤﺎﺭﺳﺘﻬﺎ
ﻳﻌﺎﻗﺐ ﺑﺎﻟﺠﻠﺪ ﺑﻤﺎ ﻻ ﻳﺠﺎﻭﺯ ﻣﺎﺋﺔ ﺟﻠﺪﺓ ﺃﻭ ﺑﺎﻟﺴﺠﻦ ﻣﺪﺓ ﻻ ﺗﺠﺎﻭﺯ ﺛﻼﺙ ﺳﻨﻮﺍﺕ
ﻳﻘﺼﺪ ﺑﻤﺤﻞ ﺍﻟﺪﻋﺎﺭﺓ، ﺃﻱ ﻣﻜﺎﻥ ﻣﻌﺪ ﻻﺟﺘﻤﺎﻉ ﺭﺟﺎﻝ ﺃﻭ ﻧﺴﺎﺀ ﺃﻭ ﺭﺟﺎﻝ ﻭﻧﺴﺎﺀ
ﻻ ﺗﻘﻮﻡ ﺑﻴﻨﻬﻢ ﻋﻼﻗﺎﺕ ﺯﻭﺟﻴﺔ ﺃﻭ ﺻﻼﺕ ﻗﺮﺑﻰ ﻭﻓﻰ ﻇﺮﻭﻑ ﻳﺮﺟﺢ ﻓﻴﻬﺎ ﺣﺪﻭﺙ ﻣﻤﺎﺭﺳﺎﺕ ﺟﻨﺴﻴﺔ

خليك من الكلام الأول دا
شوف ماهو مقصود بي محل الدعارة

الكلام دا بي بساطة برضو البيحدد شكل الحاجة دي هو العسكري
يعني انا لو عسكري وعندي أي مشكلة مع أي زول او مجموعة من الناس
او عندي صاحبي عسكري
او دفعت خمسين جنيه لأي عسكري
ممكن يتسلبط فيك ويلبسك بي كل بساطة واحدة من المواد دي

وللأسف نحنا في مجتمع متخلف مابيرحم أبدا
لو خمو مجموعة من الطلبة والطالبات واقفين جمب الجامعة مثلا
او راكبين حافلة ماشين أي حتة وودوهم القسم
حتى لو ماجلدوهم الناس ح تعاين ليهم تماما زي الملفوفين بي ملايات

اما لو عسكري شاغلك في الشارع
ورديتي ليهو ممكن بموجب سلطاتو يدينك بالمادة دي
ًولو بلون الطرحة زي ماحصل في القضية الأخيرة بتاعة أميرة مثلا

وبالتأكيد لو وداك القسم
برضو لو ماجلدوك ، أمك في البيت لو عرفت ح تعاين ليك كيف كيف
خليك من باقي الناس

الحل الوحيد المفيد والفعال حالياً في المواضيع دي
إنو يكون عندك قريبك او صاحبك ضابط او (هوا) في الحكومة
بجي بي سلطتو يهرش العسكري
ويقوليهو
عاين كويس في الهدوم دي يارمة إنت !!
فاضحة دي ؟؟؟
يقوم العسكري يحييهو ويقوليهو
أبداً سعادتك مافاضحة

يشطبو البلاغ وتمشي مع هواك دا البيت

وإذا ماعندك (هوا)
ممكن تدفعي قروش كويسة ،، تلفونك في حالة العدم
أو تحنسي للصباح